ក្រោយពី Starbucks បានប្រកាសជាបើកចំហរពីគម្រោងឈានជើងចូលមកទីផ្សារកម្ពុជានៅចុងឆ្នាំ២០១៥នេះ
មានមនុស្សម្នាមិនតិចនោះទេដែលចាប់អារម្មណ៍ពីវត្តមានរបស់ម៉ាកហាងកាហ្វេលំដាប់ខ្ពស់មួយនេះ។
ហាងដំបូងគេដែលនឹងត្រូវលើកផ្លាកសញ្ញា Starbucks Coffee នៅលើទឹកដីកម្ពុជា
គឺស្ថិតនៅក្នុងព្រលានយន្ដហោះអន្តរជាតិភ្នំពេញ
ហើយនៅចុងឆ្នាំ២០១៦ខាងមុខគេគ្រោងនឹងពង្រីកសាខាទី២នៅកណ្ដាលរាជធានីភ្នំពេញ។
តើការឈានជើងរបស់ Starbucks ក្នុងទីផ្សារកម្ពុជា
វានឹងហ៊ុចផលអ្វីខ្លះសម្រាប់កម្ពុជា?
Starbucks បានក្លាយជាក្រុមហ៊ុនមួយដែលបានហក់ចូលក្នុងទីផ្សារហ៊ុន
(Stock) នៅឆ្នាំ១៩៩២ ជាមួយនឹងចំនួនសាខាសរុប១២៥កន្លែង និងមានមូលធនទីផ្សារ
(Market Cap) ២៥០លានដុល្លារប៉ុណ្ណោះ ខណៈដែលបច្ចុប្បន្ននេះ
មានសាខារហូតដល់ជាង២ម៉ឺនសាខា នៅ៦៦ប្រទេស
ព្រមទាំងមានមូលធនទីផ្សារប្រមាណ៧០ពាន់លានដុល្លារ។ ទន្ទឹមនឹងនោះ តម្លៃភាគហ៊ុនរបស់ Starbucks ក៏មានការកើនឡើងយ៉ាងខ្លាំងផងដែរ ពោលគឺកើនរហូតដល់១,២០០% បើគិតតាំងពីឆ្នាំ២០០៨។
តាមស្ថិតិមួយរបស់ Starbucks បានបង្ហាញថាជាង ៦០%
នៃហាងចំនួនហាងរបស់ខ្លួន គឺមាននៅចិន និងអាស៊ីប៉ាស៊ីហ្វិក ហើយនៅរយៈពេលជាង៥ឆ្នាំទៀត
ចំនួនហាងរបស់ Starbucks នឹងអាចកើនឡើងដល់៣ម៉ឺនសាខានៅទូទាំងពិភពលោក។
យ៉ាងណាមិញ ម៉ាកហាងកាហ្វេ
Starbucks ដែលត្រៀមនឹងចូលមកទីផ្សារកម្ពុជានៅចុងឆ្នាំ២០១៥នេះ
ក៏មានវត្តមានក្រោយប្រទេសថៃ និងវៀតណាមដែរ ដោយក្នុងនោះStarbucks បានចូលទីផ្សារថៃតាំងពីឆ្នាំ១៩៩៨មកម្លេះ ដែលមានជាង២០០សាខា
និងមានគោលដៅពង្រីកបន្ថែមឲ្យបានដល់៤០០សាខានៅ៥ឆ្នាំបន្ទាប់ទៀត។ ចំណែកឯ Starbucks
នៅវៀតណាមវិញទើបតែបើកបានជាង២ឆ្នាំប៉ុណ្ណោះ និងទើបមាន៣សាខា។ តាមក្រុមហ៊ុន
Hong Kong Maxim’s Group ដែលទទួលបានសិទ្ធិធ្វើអាជីវកម្មលើម៉ាក
Starbucks ប្រចាំនៅអាស៊ីប៉ាស៊ីហ្វិកបានលើកឡើងថា
ក្រុមហ៊ុនរបស់ខ្លួន គ្រោងនឹងបើកឲ្យបាន៣,៣០០សាខានៅ១២ប្រទេសក្នុងតំបន់ដែលខ្លួនកាន់កាប់
ដោយក្នុងនោះ សម្រាប់តែប្រទេសចិនមួយប៉ុណ្ណោះមានរហូតដល់ប្រមាណ៧០០សាខា។ទោះយ៉ាងណា
គេមិនទាន់ដឹងថាតើសម្រាប់ទីផ្សារកម្ពុជាក្រុមហ៊ុននេះនឹងបើកប៉ុន្មានសាខានៅឡើយទេ
ដោយគ្រាន់តែដឹងថា
នៅចុងឆ្នាំនេះគេគ្រោងនឹងបើកសាខាទី១នៅព្រលានយន្ដហោះអន្តរជាតិភ្នំពេញ
និងសាខាទី២គ្រោងនឹងបើកនៅកណ្ដាលរាជធានីភ្នំពេញនៅចុងឆ្នាំ២០១៦។
ទោះយ៉ាងណាក៏ដោយការមកដល់របស់
Starbucks ត្រូវបានគេលើកឡើងថា
ជាដៃគូប្រជែងថ្មីមួយទៀតរបស់ហាងកាហ្វេក្នុងស្រុកជាពិសេស គឺហាងកាហ្វេ Brown ខណៈដែលហាងកាហ្វេក្នុងស្រុកមួយនេះ
បានពង្រីកសាខារបស់ខ្លួន១០សាខារួចមកហើយនៅរាជធានីភ្នំពេញ។
បើតាមប្រសាសន៍របស់លោក ចាង ប៊ុនលាងដៃគូគ្រប់គ្រងរបស់កាហ្វេ Brown Café and
Bakeryធ្លាប់បានថ្លែងប្រាប់កាសែតក្នុងស្រុកមួយថា
គុណភាពផលិតផលនៅតែជាជម្រើសមួយសម្រាប់អតិថិជន និងជាចំណុច ពិសេសរបស់ Brown។ លោកថា កាហ្វេរបស់ Brown គឺត្រូវបានធ្វើឡើងដោយដៃ
(Handcrafted) តែ Starbucks គឺភាគច្រើនធ្វើឡើងដោយមាស៊ីនស្វ័យប្រវត្តិ
(Fully automated machines) ដូច្នេះ
វាមិនមានសិល្បះក្នុងការធ្វើកាហ្វេនោះទេ
តែវាជាការប្រើប្រាស់ម៉ាស៊ីនដើម្បីផលិតកាហ្វេច្រើនជាង។ លោកប៊ុនលាងបន្ថែមទៀតថា
ទំហំនៃចំណែកទីផ្សារសម្រាប់ Starbucks នៅកម្ពុជា
ហាក់ដូចជាមិនមានច្រើននោះទេ
ដោយលោកលើកឡើងថាតម្រូវការទីផ្សារហាងកាហ្វេក្នុងរយៈពេលពីរបីឆ្នាំទៀតទេអាចនឹងមានការថយចុះ
ដូច្នេះប្រសិនបើពួកគេចង់បើកហាងពី ៥០ ទៅ ៦០កន្លែង លោកមិនប្រាកដថាវានឹងមានទីផ្សារនោះទេ។
ដោយឡែក បើតាមប្រសាសន៍របស់លោក ហេង សេងលី
នាយកគ្រប់គ្រងទូទៅក្រុមហ៊ុន Park Café បានលើកឡើងថា
ការមកដល់របស់ Starbucks ហាក់មិនមានភាពភ្ញាក់ផ្អែលខ្លាំងនោះទេ
ព្រោះបច្ចុប្បន្នកម្ពុជាក៏មានហាងកាហ្វេម៉ាកអន្តរជាតិមួយចំនួនបានចូលមកផងដែរ
ដូចជា Gloria
Jeans, The Coffee Bean & Tea Leaf និង Costa Coffee ជាដើម។ ទោះយ៉ាងណា លោកថាការមកដល់នៃម៉ាក Starbucks បាននឹងកំពុងបង្ហាញឲ្យឃើញកាន់តែច្បាស់ពីសក្ដានុពលនៃទីផ្សារហាងកាហ្វេនៅកម្ពុជាដែលអាចអូសទាញម៉ាកល្បីធំៗឲ្យចូលមក។
បន្ថែមពីនេះ វានឹងធ្វើឲ្យទីផ្សារមួយនេះ កាន់តែមានភាពច្បាស់លាស់ជាងមុន ពោលគឺនឹងមានការប្រកួតប្រជែងកាន់តែស្វិតស្វាញជាងមុន
និងរកឃើញអ្នកដែលមានសមត្ថភាពពិតប្រាកដលើទីផ្សារ។ លោកសេងលី បន្តទៀតថា វត្តមានរបស់ Starbucks
នៅទីផ្សារកម្ពុជា ហាក់នៅមានភាពស្រពិចស្រពិលនៅឡើយ
ក្នុងការឈានទៅរកការប្រកួតប្រជែងដែលជោគជ័យជាមួយគូប្រជែងរបស់ខ្លួន ព្រោះទំហំទីផ្សារកម្ពុជាហាក់មានតូចនៅឡើយ
ខណៈដែលដៃគូប្រជែងរបស់ Starbucks បានពង្រីកខ្លួនជាច្រើនសាខារួចទៅហើយ។
មួយវិញទៀត
បើតាមបទពិសោធន៍របស់ម៉ាកហាងកាហ្វេអន្តរជាតិមួយចំនួនដែលបានចូលមកទីផ្សារកម្ពុជា
ក៏ពុំទាន់ឃើញមានម៉ាកណាមួយប្រកួតប្រជែងម៉ាកល្បីក្នុងស្រុក (Brown) នៅឡើយ។