“អាជីវកម្មអ្នកអាចមានរដូវកាលខ្សត់អតិថិជនតែអ្នកជាម្ចាស់មិនត្រូវខ្សត់យុទ្ធសាស្ត្រដើម្បីចាប់យកអតិថិជនទេ”
អាជីវកម្មភាគច្រើនតែងតែមានរដូវកាលខ្សត់អតិថិជន (Low Season) និងរដូវកាលសម្បូរអតិថិជន (High Season)។ ក្នុងនោះ អាជីវកម្មដែលមានរដូវកាលសម្បូរអតិថិជន គឹសំដៅទៅលើរដូវកាលដែលផលិតផល ឬសេវាកម្មរបស់អ្នកកំពុងពេញនិយមទៅនឹងតម្រូវការរបស់ប្រើប្រាស់។ ដោយឡែក ចំពោះរដូវកាលដែលធ្វើឲ្យអាជីវកម្មខ្សត់អតិថិជន គឺសំដៅទៅលើកាលៈទេសៈមួយដែលផលិតផល ឬសេវាកម្មនៃអាជីវកម្មនោះ មានតម្រូវការប្រើប្រាស់ទាប ឬស្ទើរតែគ្មានតម្រូវការពីអតិថិជន។ ទាក់ទងទៅនឹងការលើកឡើងខាងលើនេះ តើអ្នកគួរធ្វើអ្វីខ្លះនៅក្នុងរដូវខ្សត់អតិថិជន ដើម្បីឲ្យអាជីវកម្មអ្នកអាចរក្សាបាននូវស្ថិរភាព និងអាចធ្វើការប្រកួតប្រជែងបាន? ពាណិជ្ជកម្ម កម្ពុជា សូមលើកយកនូវដំណោះស្រាយសំខាន់ៗមួយចំនួន ដើម្បីចែករំលែកទៅកាន់មិត្តអ្នកអាន ដែលមានដូចខាងក្រោមនេះ៖
កំណត់ការចំណាយឲ្យនៅទាបបំផុត
វាជាគោលការណ៍ទូទៅមួយដែលអាជីវកម្ម ឬក្រុមហ៊ុនទាំងឡាយតែងតែជ្រើសយកនូវការកាត់បន្ថយការចំណាយផ្សេងៗឲ្យមានទាបបំផុត នៅក្នុងរដូវកាលខ្សត់អតិថិជន (Low Season) ព្រោះក្នុងកាលៈទេសៈនេះ អាជីវកម្មអ្នកនឹងមិនមានចំណូលគ្រប់គ្រាន់ដើម្បីទ្រទ្រង់លើការចំណាយដែលមានចំនួនច្រើននោះឡើយ។ នៅក្នុងស្ថានភាពនេះ មានអាជីវកម្មមួយចំនួន អាចឈានដល់ការសុំផ្អាកការងារបុគ្គលិកក្នុងផ្នែកមួយចំនួនជាបណ្ដោះអាសន្ន ដោយមានការកំណត់លក្ខខណ្ឌមួយចំនួន ដើម្បីព្រមព្រៀងគ្នារវាងក្រុមហ៊ុន និងបុគ្គលិក ដូចជាការសុំផ្អាកការងារបុគ្គលិករយៈពេល១ ឬ២ខែ ដោយផ្ដល់ជូននូវប្រាក់បៀវត្សរ៍ពាក់កណ្ដាលក្នុងកំឡុងពេលឈប់សម្រាកជាដើម។ ការធ្វើបែបនេះវាអាចជាជម្រើសមួយមិនសូវល្អសម្រាប់បុគ្គលិក តែវាជាផ្លូវដើរចុងក្រោយមួយសម្រាប់អាជីវកម្ម នៅពេលដែលប្រឈមមុខនឹងបញ្ហាចំណាយលើសពីលទ្ធភាព។ ភាគច្រើនរដូវកាលខ្សត់អតិថិជនសម្រាប់អាជីវកម្មតែងកើតមាននៅក្នុងរដូវវស្សាដែលមានភ្លៀងធ្លាក់ច្រើន ជាក់ស្ដែងអាជីវកម្មលក់គ្រឿងសំណង់ និងក្រុមហ៊ុនផ្ដល់សេវាដំណើរកម្សាន្ដជាដើម។ល។ ប៉ុន្ដែមានអាជីវកម្មខ្លះនៅរដូវភ្លៀងគឺជារដូវកាលសម្បូរអតិថិជនទៅវិញ តួយ៉ាងអាជីវកម្មលក់ផលិតផលសម្រាប់កសិកម្មជាដើម។
រក្សាទំនាក់ទំនងល្អជាមួយអតិថិជន
ថ្វីត្បិតតែអាជីវកម្មអ្នកកំពុងស្វិតក្នុងរដូវកាលខ្សត់អតិថិជនក៏ដោយក្ដី តែអ្នកមិនត្រូវនៅស្ងៀមដើម្បីរង់ចាំតែឱកាសសម្រាប់រដូវសម្បូរអតិថិជនមកដល់នោះទេ។ អ្នកគប្បីរក្សាបន្តទំនាក់ទំនងល្អជាមួយអតិថិជន ដោយការដើរតួជាអ្នកប្រឹក្សាយោបល់ជាមួយអតិថិជន តាមរយៈការសរសេរអ៊ីម៉ែល ឬទូរស័ព្ទសាកសួរពីសុខទុក្ខ និងបញ្ហានានាក្រោយពីការប្រើប្រាស់ផលិតផលរបស់អ្នកកាលពីពេលមុនៗជាដើម។ លើសពីនេះ អ្នកអាចបង្កើតឲ្យមានជាការលក់បញ្ចុះតម្លៃសម្រាប់អតិថិជនថ្មីៗ និងផ្ដល់ជូននូវប័ណ្ណបញ្ជុះតម្លៃពិសេសសម្រាប់អតិថិជនចាស់ៗរបស់ខ្លួនផងដែរ។ លើសពីនេះ អ្នកគប្បីចងចាំថា ថ្វីត្បិតតែក្រុមហ៊ុនអ្នកត្រូវកាត់បន្ថយការចំណាយផ្សេងៗនៅក្នុងរដូវកាលខ្សត់អតិថិជនក្ដី ប៉ុន្ដែ ការរៀបចំកញ្ចប់ថវិកាសម្រាប់ការធ្វើម៉ាឃីតធីងគឺត្រូវតែមាន។ ប្រសិនបើអ្នកមានកញ្ចប់ថវិកាតិចតួចសម្រាប់ការធ្វើម៉ាឃីតធីង អ្នកគប្បីសិក្សាឲ្យត្រូវពីអតិថិជនគោលដៅ ដែលអ្នកចង់ចាប់យក (អាចជាអតិថិជនចាស់ ឬអតិថិជនថ្មី)។ ម្យ៉ាងទៀត អ្នកត្រូវស្វែងរកគំនិតថ្មីប្លែកៗដើម្បី ទាក់ទាញការចាប់អារម្មណ៍ពីអតិថិជនរបស់អ្នក និងធ្វើការផ្សព្វផ្សាយតាមបណ្ដាញសង្គមដែលមិនមានគិតថ្លៃសេវាដូចជា Facebook, Instagram, Twitter និង Google+ ជាដើម។ ជារួម គឺអ្នកត្រូវស្វែងរកគំនិតក្នុងការរក្សា និងអូសទាញអតិថិជនឲ្យបានច្រើន ជាជាងការកាប់បំពង់រង់ចាំទឹកភ្លៀង។
ធ្វើជាដៃគូជាមួយអាជីវកម្មដែលកំពុងមានតម្រូវការ
ការធ្វើអាជីវកម្ម មិនមែនត្រូវដើរតួជាគូប្រជែងស៊ីសាច់ហ៊ុតឈាមគ្នាគ្រប់ពេលនោះទេ ប៉ុន្ដែត្រូវចេះសហការគ្នាដើម្បីធ្វើយ៉ាងណាអូសទាញប្រយោជន៍ពីគ្នាទៅវិញទៅមក។ យ៉ាងណាមិញ ប្រសិនបើអាជីវកម្មអ្នកស្ថិតក្នុងរដូវកាលខ្សត់អតិថិជនទៀតសោត អ្នកគួរតែស្វែងរកដៃគូអាជីវកម្មដែលស័ក្ដិសមដើម្បីចងសម្ព័ន្ធភាពរវាងគ្នា។ មិនតែប៉ុណ្ណោះ ប្រសិនបើអ្នកអាចស្វែងរកបាននូវដៃគូល្អ វាក៏នឹងជួយឲ្យការលក់មានការកើនឡើងផងដែរ។ ក្នុងនោះ ដើម្បីស្វែងរកបានដៃគូល្អបាន អ្នកត្រូវចេះស្វែងរកនូវអាជីវកម្មណាដែលកំពុងមានតម្រូវការខ្លាំង ខណៈដែលអាជីវកម្មអ្នកមិនសូវមានតម្រូវការ។ អ្នកអាចបង្កើតឲ្យមានជាការលក់ដោះដូរសេវាកម្ម ឬផ្ដល់នូវការបញ្ចុះតម្លៃពិសេសនៃផលិតផលជាមួយនឹងដៃគូរបស់អ្នក តួយ៉ាងចំពោះអតិថិជនដែលមកទិញផលិតផល ឬសេវាកម្មពីដៃគូរបស់អ្នក នឹងទទួលបានការបញ្ចុះតម្លៃ២០% ឬ៣០% ពីផលិតផលរបស់អ្នកដូចគ្នា។ ហេតុនេះ ទោះបីជាពួកគេមិនមានតម្រូវការ ក៏ពួកគេបានស្គាល់ពីក្រុមហ៊ុនអ្នក និងប្រាប់តគ្នាពីក្រុមហ៊ុន ឬផលិតផលអ្នកទៅកាន់សាច់ញាតិ ឬមិត្តភក្ដិផ្សេងទៀតដែលអាចជាអ្នកមានតម្រូវការដែរ។
ត្រៀមខ្លួនឲ្យបានរួចរាល់
នៅក្នុងរដូវខ្សត់អតិថិជននៃអាជីកម្ម វាអាចជាឱកាសមួយសម្រាប់សហគ្រិនក៏ដូចជាម្ចាស់អាជីវកម្ម គួរចំណាយពេលដើម្បីត្រៀមខ្លួន និងបង្កើតជាគម្រោងយុទ្ធសាស្ត្រដើម្បីវាយសម្រុកលើទីផ្សារនៅពេលរដូវកាលសម្បូរអតិថិជនមកដល់។ ក្នុងអំឡុងពេលនេះ អ្នកត្រូវប្រាកដថា អ្វីៗទាំងអស់ដែលមាននៅក្នុងសង្វាក់អាជីវកម្មរបស់អ្នកត្រូវបានរៀបចំ និងផ្លាស់ប្តូរបានត្រឹមត្រូវប្រសើរជាងមុន។ យោងតាមប្រសាសន៍របស់កញ្ញា កន ចៅបុប្ផា អ្នកគ្រប់គ្រប់ក្រុមហ៊ុន ស៊ិន សាវុន ជាក្រុមហ៊ុនដែលផ្គត់ផ្គង់ទៅលើ ការចាក់បំពេញដី ដឹកខ្សាច់ ថ្ម ជួលអេស្កាវាទ័រ និងឡានដឹកដី បានប្រាប់ ឲ្យពាណិជ្ជកម្ម កម្ពុជាដឹងថា ស្ថិតក្នុងរដូវកាលខ្សត់អតិថិជននេះ ក្រុមហ៊ុនកញ្ញាបានត្រៀមខ្លួនជាស្រេច មុននឹងរដូវកាលសម្បូរអតិថិជនមកដល់។ ក្នុងន័យនេះ កញ្ញាបានពន្យល់ថា រាល់គ្រឿងចក្រទាំងអស់គឺត្រូវបានត្រួតពិនិត្យ និងជួសជុលគ្រឿងបន្លាស់ឲ្យបានរួចរាល់ ដើម្បីធានានូវដំណើរការគ្រឿងម៉ាស៊ីនបានល្អ ជៀសវាង ភាពរអាក់រអួលណាមួយកើតឡើង ក្នុងពេលកំពុងប្រតិបត្តិនារដូវកាលសម្បូរអតិថិជន (High Season)។ ដោយឡែក ប្រសិនបើអាជីវកម្មរបស់អ្នកជាប្រភេទអាជីវកម្មលក់ផលិតផល ឬលក់ម្ហូបអាហារវិញ អ្នកគួរតែស្វែរកនូវមុខម្ហូប ឬផលិតផលដែលថ្មីប្លែក ដែលអាចបំពេញតម្រូវកាអតិថិជនបានកាន់តែប្រសើរ។ លើសពីនេះ ត្រូវសរសេរគម្រោងអាជីវកម្មថ្មីដើម្បីកំណត់ពីគោលដៅនៃការលក់របស់ខ្លួន និងយុទ្ធសាស្ត្រនៃការធ្វើម៉ាឃីតធីងផ្សេងៗសម្រាប់ប្រកួតប្រជែងលើទីផ្សារក្នុងអំឡុងពេលរដូវកាលសម្បូរអតិថិជនមកដល់ជាដើម។
សរុបជារួម ក្នុងអំឡុងពេលខ្សត់អតិថិជន វាមិនមែនជាបញ្ហាធ្ងន់ធ្ងរនោះទេសម្រាប់អាជីវកម្ម ប្រសិនបើអ្នកមានផែនការ និងយុទ្ធសាស្ត្រច្បាស់លាស់។ ផ្ទុយទៅវិញ វាជាឱកាសមួយសម្រាប់អ្នកដកស្រង់នូវបទពិសោធន៍ថ្មីៗ និងធ្វើការផ្លាស់ប្តូររាល់កំហុសនានាដែលអ្នកធ្លាប់ជួបកាលពីមុន ដើម្បីកែច្នៃវាឲ្យកាន់តែប្រសើរឡើង។
“អ្នកត្រូវស្វែងរកគំនិតក្នុងការរក្សា និងអូសទាញអតិថិជនឲ្យបានច្រើន ជាជាងការកាប់បំពង់រង់ចាំទឹកភ្លៀង”
.png "English"){kind=small}
