“អ្នកជោគជ័យក្នុងអាជីវកម្ម និងជីវិតត្រូវតែពូកែលើការគ្រប់គ្រងលំហូរសាច់ប្រាក់”
លំហូរសាច់ប្រាក់ (Cash Flow) ប្រៀបបាននឹងសរសៃឈាមដ៏សំខាន់សម្រាប់សង្វាក់អាជីវកម្មដែលសហគ្រិន ទាំងឡាយចាំបាច់ត្រូវស្វែងយល់ដោយយកចិត្តទុកដាក់។ លំហូរសាច់ប្រាក់ត្រូវបានកើតមានឡើងតាំងពីពេលអ្នកចាប់ផ្ដើមអាជីវកម្មក្នុងថ្ងៃដំបូងម្លេះ ហើយវាត្រូវបានរាប់បញ្ជូលទាំងចរន្ដសាច់ប្រាក់ចេញ និងចូល។
តាមប្រសាសន៍របស់កញ្ញា លី កញ្ញារ័ត្ន នាយិកាសេវាហិរញ្ញវត្ថុ និងពន្ធដារ នៃក្រុមហ៊ុន Aplus Consulting បានឲ្យដឹងថា រាល់អាជីវកម្មភាគច្រើនតែងតែជួបប្រទះនូវបញ្ហាលំហូរសាច់ប្រាក់ មិនថាតែអាជីវកម្មខ្នាតតូច ខ្នាតមធ្យម និងខ្នាតធំនោះទេ ជាពិសេស វាតែងកើតមាននៅក្នុងវិស័យផលិតកម្ម និងសំណង់។ កញ្ញាបញ្ជាក់ថា សញ្ញាណដែលអាចបញ្ជាក់ឲ្យដឹងថាអាជីវកម្មអ្នកកំពុងជួបវិបត្តិលំហូរសាច់ប្រាក់ គឺតាមរយៈការទទួលបាននូវគណនីត្រូវទទួលយឺតយាវ (Aging Receivable) និងគណនីត្រូវទូទាត់ត្រូវបានចំណាយក្នុងពេលរហ័សពេក ឬអាចបណ្ដាលមកពីការលក់ធ្លាក់ចុះផងដែរ។ យ៉ាងណាមិញ នៅពេលដែលសាច់ប្រាក់នាពេលចុងគ្រាតូចជាងសាច់ប្រាក់ដើមគ្រាមានន័យថាលំហូរសាច់ប្រាក់ក្នុងក្រុមហ៊ុនអ្នកមានការថយចុះ។ ដោយឡែក ប្រសិនបើសាច់ប្រាក់នាពេលចុងគ្រាធំជាងសាច់ប្រាក់នាពេលដើមគ្រា នោះបញ្ហាញថា លំហូរសាច់ប្រាក់ក្នុងក្រុមហ៊ុនអ្នកគឺមានការកើនឡើង។
ខាងក្រោមនេះ គឺជាដំណោះស្រាយ និងការគ្រប់គ្រងលំហូរសាច់ប្រាក់ឲ្យមានភាពល្អប្រសើរទ្បើង៖
តាមប្រសាសន៍របស់កញ្ញា លី កញ្ញារ័ត្ន នាយិកាសេវាហិរញ្ញវត្ថុ និងពន្ធដារ នៃក្រុមហ៊ុន Aplus Consulting បានឲ្យដឹងថា រាល់អាជីវកម្មភាគច្រើនតែងតែជួបប្រទះនូវបញ្ហាលំហូរសាច់ប្រាក់ មិនថាតែអាជីវកម្មខ្នាតតូច ខ្នាតមធ្យម និងខ្នាតធំនោះទេ ជាពិសេស វាតែងកើតមាននៅក្នុងវិស័យផលិតកម្ម និងសំណង់។ កញ្ញាបញ្ជាក់ថា សញ្ញាណដែលអាចបញ្ជាក់ឲ្យដឹងថាអាជីវកម្មអ្នកកំពុងជួបវិបត្តិលំហូរសាច់ប្រាក់ គឺតាមរយៈការទទួលបាននូវគណនីត្រូវទទួលយឺតយាវ (Aging Receivable) និងគណនីត្រូវទូទាត់ត្រូវបានចំណាយក្នុងពេលរហ័សពេក ឬអាចបណ្ដាលមកពីការលក់ធ្លាក់ចុះផងដែរ។ យ៉ាងណាមិញ នៅពេលដែលសាច់ប្រាក់នាពេលចុងគ្រាតូចជាងសាច់ប្រាក់ដើមគ្រាមានន័យថាលំហូរសាច់ប្រាក់ក្នុងក្រុមហ៊ុនអ្នកមានការថយចុះ។ ដោយឡែក ប្រសិនបើសាច់ប្រាក់នាពេលចុងគ្រាធំជាងសាច់ប្រាក់នាពេលដើមគ្រា នោះបញ្ហាញថា លំហូរសាច់ប្រាក់ក្នុងក្រុមហ៊ុនអ្នកគឺមានការកើនឡើង។
ខាងក្រោមនេះ គឺជាដំណោះស្រាយ និងការគ្រប់គ្រងលំហូរសាច់ប្រាក់ឲ្យមានភាពល្អប្រសើរទ្បើង៖
លំហូរសាច់ប្រាក់របស់អ្នកក្រ និងអ្នកមាន
តាមសៀវភៅឪពុកអ្នកមាន ឪពុកអ្នកក្ររបស់លោក Robert T. Kiyosaki បានឲ្យដឹងថា លំហូរសាច់ប្រាក់កើតចេញពី៤ប្រភពផ្សេងគ្នា ហើយ២ក្នុងចំណោមនោះ ត្រូវបានគេលើកថាជាលំហូរសាច់ប្រាក់របស់អ្នកក្រ និង២ផ្សេងទៀតជាលំហូរសាច់ប្រាក់របស់អ្នកមាន។
លំហូរសាច់ប្រាក់ដែលគេចាត់ទុកថាជាលំហូរសាច់ប្រាក់របស់អ្នកក្រ ទី១គឺ ភាពជាបុគ្គលិក (E= Employee) ជាអ្នកដែលធ្វើការងារឲ្យគេដើម្បីស្វែងរកចំណូល ហើយប្រាក់ចំណូលរបស់ពួកគេ ត្រូវបានហូរចូលមួយខែម្តង។ ទី២ គឺធ្វើការដោយខ្លួនឯង (S=Self-employed) ជាអ្នកដែលមានមុខរបរ ឬការងារផ្ទាល់ខ្លួន តែពួកគេមានភាពរវល់ច្រើនជាមួយការរកស៊ី និងមិនសូវមានពេលវេលាគ្រប់គ្រាន់សម្រាប់ខ្លួនឯង និងក្រុមគ្រួសារនោះទេ ថ្វីត្បិតតែមានអាចរកចំណូលច្រើនគួរសមយ៉ាងណាក្ដី។ អ្នកទី២នេះ លំហូរសាច់ប្រាក់អាចហូរចូលរាល់ថ្ងៃ តែមានបញ្ហាច្រើន ដោយសារ គាត់មិនមានប្រព័ន្ធគ្រប់គ្រងត្រឹមត្រូវ ធ្វើតែម្នាក់ឯង ធ្វើការគ្មានពេលទំនេរ ខ្វះការគ្រប់គ្រងទិន្នន័យឲ្យបានច្បាស់លាស់។
រីឯលំហូរសាច់ប្រាក់របស់អ្នកមានវិញ ទី១ គឺ ម្ចាស់អាជីវកម្មខ្នាតធំ (B=Business Owner) ជាអ្នកដែលមានលទ្ធភាពគ្រប់គ្រាន់ក្នុងការអូសទាញបុគ្គលិក (E=Employee) មកធ្វើការងារឲ្យខ្លួន និងមានរចនាសម្ព័ន្ធច្បាស់លាស់សម្រាប់ក្រុមហ៊ុន។ ភាគច្រើនពួកគេក៏ធ្វើការងារដូចជាបុគ្គលិកដែរ តែពួកគេមានពេលវេលាច្រើនសម្រាប់ខ្លួនឯង និងមានពេលគិតពីយុទ្ធសាស្ត្រ និងគម្រោងក្នុងការគ្រប់គ្រប់អាជីវកម្ម។ ទី២ គឺអ្នកវិនិយោគ (I=Investor) ជាអ្នកដែលមានដើមទុនច្រើនសម្រាប់បណ្ដាក់ទុនជាមួយម្ចាស់អាជីវកម្មនានា( B=Business Owner)។ ពួកគេជាអ្នកដែលបោះទុនរកស៊ីដោយមិនបានធ្វើការងារនោះទេ ពួកគេមានពេលវេលាច្រើនសម្រាប់ខ្លួនឯង និងគ្រួសារ។ អាជីវកម្មរបស់ពួកគេមានដូចជា ទិញលក់អចលនទ្រព្យ ផ្សារមូលបត្រ និងមានវិនិយោគក្នុងវិស័យឧស្សាហកម្ម កសិកម្ម និងទេសចរណ៍ផងដែរ។ អ្នកទាំងពីរប្រភេទចុងក្រោយនេះ លុយហូរចូលទៅពួកគាត់ មិនមែនមួយខែម្តងទេ គឺ រាល់ថ្ងៃ ឬ រាល់នាទីក៏មានដែរ។
តាមប្រភពទាំងនេះ សរបញ្ជាក់ឲ្យឃើញថាប្រសិនបើអ្នកកំពុងស្ថិតក្នុង E ឬ S អ្នកគួរតែវិឌ្ឍន៍ខ្លួនឲ្យទៅជា B ឬ I ទើបធ្វើឲ្យលំហូរសាច់ប្រាក់របស់អ្នកកាន់តែប្រសើរ។
សហគ្រិនជោគជ័យទាល់តែពូកែគ្រប់គ្រងលំហូរសាច់ប្រាក់
ការចេះគ្រប់គ្រងលំហូរប្រាក់ចេញ ឬចូលនៅក្នុងការធ្វើអាជីវកម្ម ក៏មិនខុសពីការចាយវាយប្រចាំថ្ងៃសម្រាប់ការរស់នៅក្នុងគ្រួសារនោះដែរ ពោលគឺសហគ្រិន ឬមេគ្រួសារត្រូវតែធ្វើយ៉ាងណារកចំណូលឲ្យបានច្រើនជាងការចំណាយ ទើបអាជីវកម្ម ឬគ្រួសាររបស់អ្នកមានការវិឌ្ឍទៅមុខ។ តាមប្រសាសន៍របស់កញ្ញា លី កញ្ញារ័ត្ន នាយិកាសេវាហិរញ្ញវត្ថុ និងពន្ធដារ នៃក្រុមហ៊ុន Aplus Consulting បានលើកឡើងថា នៅពេលដែលក្រុមហ៊ុនមួយមានភាពល្អប្រសើរក្នុងការគ្រប់គ្រងលំហូរសាច់ប្រាក់ វានឹងធ្វើឲ្យក្រុមហ៊ុននោះ កាន់តែឆ្ពោះទៅរកភាពររីកចម្រើនទៅមុខដូចជា ៖
· - ជំរុញឲ្យផលិតភាពមានការកើនឡើង៖ ម្ចាស់ក្រុមហ៊ុន ឬអាជីវកម្មនោះ មិនចាំបាច់មានការព្រួយបារម្ភពីបញ្ហាលំហូរសាច់ប្រាក់ និងមានពេលវេលាច្រើនគិតពីយុទ្ធសាស្ត្រល្អៗដើម្បីឲ្យការលក់ និងផលិតភាពមានការកើនឡើង។
· - មានលទ្ធភាពនៃការបង្វិលទុន (Liquidity) ៖ នៅពេលដែលអ្នកមានសាច់ប្រាក់ក្នុងដៃ អ្នកនឹងអាចទូទាត់ជាមួយអ្នកផ្គត់ផ្គង់ (Supplier) ទាន់កាលកំណត់។ ហេតុនេះ ការធ្វើប្រតិបត្តិការ (Operation) របស់ក្រុមហ៊ុនអ្នកក៏កាន់តែមានភាពល្អប្រសើរផងដែរ។
· - មានលទ្ធភាពវិនិយោគផ្សេងទៀត (Reinvest) ៖ ជាការពិតណាស់ នៅពេលដែលចរន្ដសាច់ប្រាក់របស់អ្នកស្ថិតក្នុងវិវឌ្ឍនភាព នោះអ្នកនឹងអាចមានលទ្ធភាពគ្រប់គ្រាន់ដើម្បីពង្រីកអាជីវកម្ម។ លើសពីនេះ អ្នកនឹងមានលទ្ធភាពបង្កើនចំនួនបុគ្គលិក ពង្រីកទ្រព្យទុន (Assets) និងវិនិយោគលើបច្ចេកវិជ្ជាផ្សេងៗដើម្បីបង្កើនផលិតភាព ផលចំណេញ និងការប្រកួតប្រជែង។
· - មិនជាប់ពាក់ព័ន្ធនឹងបំណុល៖ នៅពេលដែលអ្នកអាចគ្រប់គ្រងលំហូរសាច់ប្រាក់បានល្អ នោះអ្នកអាចកាត់បន្ថយកម្ចីពីធនាគារដែលមានការប្រាក់ខ្ពស់ ។ ម្យ៉ាងទៀត អ្នកក៏មិនមានការព្រួយបារម្ភពីហានិភ័យនៃបំណុលនោះដែរ។
· - មានភាពសារទរនៅក្នុងក្រុមហ៊ុន៖ ម្ចាស់អាជីវកម្ម ឬសហគ្រិន នឹងលែងជួបនូវផលលំបាកក្នុងការដោះស្រាយបញ្ហាលំហូរសាច់ប្រាក់នៅក្នុងក្រុមហ៊ុន ឬអាជីវកម្ម។ ហេតុនេះ វានឹងធ្វើឲ្យបរិយាកាស ធ្វើការងារក្នុងក្រុមហ៊ុនក៏មានភាពល្អប្រសើរ រួមទាំងបុគ្គលិកថ្នាក់ក្រោម និងថ្នាក់កំពូល។
វីធីសាស្ត្រក្នុងការគ្រប់គ្រងលំហូរសាច់ប្រាក់
មុននឹងបានដឹងពីវិធីសាស្ត្រក្នុងការគ្រប់គ្រង អ្នកត្រូវដឹងពីបញ្ហាដែលបណ្ដាលឲ្យកើតមានវិបត្តិនៃលំហូរសាច់ប្រាក់ជាមុនសិន។ ជាទូទៅ បញ្ហាដែលបណ្ដាលឲ្យកើតមាននូវវិបត្តិនេះ គឺវាមានច្រើនយ៉ាងណាស់ដែលអាស្រ័យទៅលើប្រភេទអាជីវកម្មនិមួយៗ។ ទាក់ទងនឹងបញ្ហានេះ កញ្ញា លី កញ្ញារ័ត្នបានឲ្យដឹងដែរថា ភាគច្រើនវិបត្តិលំហូរសាច់ប្រាក់ក្នុងក្រុមហ៊ុន ឬអាជីវកម្ម វាតែងកើតមានឡើងតាមរយៈការលក់ធ្លាក់ចុះ ការទិញទំនិញស្តុកហួសប្រមាណ ព័ត៌មានហិរញ្ញវត្ថុមិនច្បាស់លាស់ ខ្វះការគ្រប់គ្រងលើគណនីយត្រូវទទួល (Account Receivable) និងការចាយវាយដោយខ្វះការត្រួតពិនិត្យច្បាស់លាស់ជាដើម។ល។
ខាងក្រោមនេះជាដំណោះស្រាយក្នុងការគ្រប់គ្រងលំហូរសាច់ប្រាក់ដែលអ្នកគួរស្វែងយល់៖
· ព្យាករណ៍ពីលំហូរសាច់ប្រាក់៖ អ្នកត្រូវដឹងពីប្រភេទអាជីវកម្មរបស់ខ្លួន និងព្យាករណ៍ពីចំនួនសាច់ប្រាក់ដែលត្រូវចំណាយ និងចំណូល ហើយព័ត៌មានទាំងនោះអ្នកអាចទទួលបានពីផ្នែកធនធានមនុស្ស អ្នកគ្រប់គ្រងផ្នែកផលិត និងផ្នែកទីផ្សារនៃក្រុមហ៊ុនរបស់អ្នក។ ក្រោយពីអ្នកបានទទួលព័ត៌មានទាំងអស់នោះហើយ អ្នកនឹងអាចដឹងពីតម្រូវការនៃចំនួនសាច់ប្រាក់ដែលអ្នកត្រូវចំណាយ និងពេលវេលាដែលត្រូវចំណាយផងដែរ។
· គ្រប់គ្រងព័ត៌មានលំហូរសាច់ប្រាក់៖ ម្ចាស់ក្រុមហ៊ុន ឬអាជីវកម្មត្រូវតាមដានរបាយការណ៍នៃចំណូលចំណាយឲ្យបានច្បាស់លាស់។ លើសពីនេះ ត្រូវបង្រៀនបុគ្គលិកទទួលខុសត្រូវលើផ្នែកនេះ ឲ្យចេះពីរបៀបស្រង់ទិន្នន័យ និងគ្រប់គ្រងពីលំហូរសាច់ប្រាក់ ដើម្បីឲ្យពួកគេអាចផ្ដល់នូវទន្និន័យបានងាយស្រួល លឿន និងមានតម្លាភាព។
· - មានគម្រោងការណ៍បង្ការហានិភ័យ៖ ត្រូវមានគម្រោងត្រឹមត្រូវដើម្បីទប់ស្កាត់ហានិភ័យដែលកើតមានឡើងដោយចៃដន្យ។
· - រៀបចំកញ្ចប់ថវិកាដែលត្រូវចំណាយឲ្យបានច្បាស់លាស់ និងចំពេលវេលា។
· - គ្រប់គ្រងគណនីយត្រូវទទួល (Account Receivable) ៖ អាជីវកម្ម ឬក្រុមហ៊ុនមួយចំនួនតែជួបប្រទះនូវបញ្ហាជំពាក់ពីអតិថិជន ដែលធ្វើឲ្យចរន្ដនៃលំហូរសាច់ប្រាក់ត្រូវរាំងស្ទះ ដើម្បីដោះស្រាយនូវបញ្ហានេះ អ្នកអាចសាកល្បងនូវមធ្យោបាយខាងក្រោមនេះ ៖
- បញ្ចុះតម្លៃ សម្រាប់អ្នកដែលទិញបង់លុយភ្លាមៗ
- ត្រួតពិនិត្យលើអតិថិជនធំៗដែលមានកិច្ចសន្យាច្បាស់លាស់លើគណនីត្រូវទទួល
- នៅពេលលក់ត្រូវចេញវិក័យបត្រភ្លាមៗ ត្រូវព្យាយាមទាក់ទងអតិថិជនដើម្បីទទួលបានការទូទាត់តាមរយៈ ទូរស័ព្ទ ឬឆ្លើយឆ្លងអ៊ីម៉ែលជាដើម។ បង្កើតឲ្យមានជាការពិន័យ ចំពោះអតិថិជនណាដែលបង់ប្រាក់យឺតយាវហួសកាលបរិច្ឆេតកំណត់ និងធ្វើឲ្យមានភាពងាយស្រួលដើម្បីឲ្យអតិថិជនធ្វើការទូទាត់។
· - គ្រប់គ្រងគណនីយត្រូវទូទាត់ (Account Payable) ៖ ត្រូវចរចាជាមួយអ្នកផ្គត់ផ្គង់ ដើម្បីស្នើរឲ្យមានការទូទាត់ក្នុងរយៈពេលយូរ តែក៏មិនត្រូវឲ្យហួសថ្ងៃកំណត់ដែល ឬប្រសិនបើវិក័យបត្រទូទាត់របស់ក្រុមហ៊ុនអ្នកមានសុពលភាព៣០ថ្ងៃ គួរតែពុំទាន់ទូទាត់មុនថ្ងៃ ព្រោះវាអាចនឹងបណ្ដាលឲ្យអ្នកជួបបញ្ហាលំហូរសាច់ប្រាក់ប្រសិនបើក្រុមហ៊ុនអ្នកមានហានិភ័យណាមួយកើតឡើង។
- - ត្រូវចេះជ្រើសរើសអ្នកផ្គត់ផ្គង់ល្អ ( supplier) ដោយមិនត្រូវផ្ដោតលើតែតម្លៃថោកនោះទេ ផ្ទុយទៅវិញត្រូវជ្រើសរើសអ្នកផ្គត់ផ្គងណាដែលអាចជួយសម្រួលដល់ចលនាលំហូរសាច់ប្រាក់របស់ក្រុមហ៊ុនអ្នកទើបជាការប្រសើរ។
ជារួម ដូចទៅនឹងការបកស្រាយខាងលើលំហូរសាច់ប្រាក់គឺប្រៀបបាននឹងសរសៃឈាមដែលត្រូវរត់ចុះឡើងនៅក្នុងខ្លួនប្រាណរបស់មនុស្សដូច្នោះដែរ។ យ៉ាងណាមិញ ក្នុងន័យអាជីវកម្មវិញប្រសិនបើចលនានៃលំហូរសាច់ប្រាក់របស់អ្នកកំពុងរាំងស្ទះត្រង់ចំណុចណាមួយនោះ អ្នកត្រូវដោះស្រាយវាឲ្យបានលឿនបំផុតដើម្បីកុំឲ្យមានបញ្ហារីកដាលកាន់តែធំទៅៗ។ យោងតាមមតិរបស់កញ្ញា លី កញ្ញារ័ត្នបានគូសបញ្ជាក់ថា នៅក្នុងអាជីកម្មសាច់ប្រាក់ត្រូវបានបែងចែកចេញជាបី គឺការលក់ (Turnover) ប្រាក់ចំណេញ (Profit) និងលំហូរសាច់ប្រាក់ (Cash Flow) ហេតុនេះម្ចាស់អាជីវកម្មត្រូវចេះវិភាគ និងតាមដាននូវព័ត៌មានដែលទាក់ទងនឹងចំណុចទាំងបីខាងលើនេះឲ្យបានម៉ត់ចត់ និងត្រូវចេះស្វែងរកការប្រឹក្សាយោលបល់ពីមន្ត្រីជំនាញផ្នែកហិរញ្ញវត្ថុប្រសិនបើអ្នកជួបបញ្ហាអ្វីមួយ៕
ដកស្រង់ពីទស្សនាវដ្ដីពាណិជ្ជកម្ម កម្ពុជា