“Franchise ជួយឲ្យអ្នកបង្កើតសាខាកាន់តែច្រើនដោយមិនចំណាយទុនខ្លួនឯង ថែមទាំងទទួលបានផលចំណេញនឹកស្មានមិនដល់ “
អាជីវកម្មទិញសិទ្ធិលក់បន្ត (Franchise) គឺជាអាជីវកម្មមួយបែបដែលមានការពេញនិយមខ្លាំងនៅតាមបណ្ដាប្រទេសអភិវឌ្ឍន៍ និងកំពុងអភិវឌ្ឍមួយចំនួន។ តួយ៉ាង ប្រទេសកម្ពុជានៅរយៈពេលប៉ុន្មានឆ្នាំចុងក្រោយនេះ ក៏មានការពេញនិយមលើអាជីវកម្មនេះគួរឲ្យកត់សម្គាល់ផងដែរ ដោយគេសង្កេតឃើញថាមានម៉ាក Franchise បរទេសយ៉ាងច្រើន បានហូរចូលកម្ពុជា ខណៈដែលអាជីវកម្មក្នុងស្រុកមួយចំនួនបាននិងកំពុងប្រឈមមុខនឹងការប្រកួតប្រជែងយ៉ាងខ្លាំងពីសំណាក់ម៉ាក Franchise ទាំងនោះ។ ដើម្បីអាចធ្វើការប្រកួតប្រជែង និងពង្រឹងនូវនិរន្តរភាពនៃអាជីវកម្មឲ្យបានស្ថិតស្ថិរយូរអង្វែង ម្ចាស់អាជីវកម្មគួរណាស់តែខិតខំកសាងនូវម៉ាកសញ្ញារបស់ខ្លួនឲ្យបានរឹងមាំ និងស្វែងរកនូវលក្ខណៈពិសេសដែលអាជីវកម្មផ្សេងទៀតមិនមាន (Unique) ដើម្បីអាចឈានទៅរកការធ្វើ Franchise អាជីវកម្មបាន។ ពាណិជ្ជកម្ម កម្ពុជាសូមលើកយកនូវចំណុចសំខាន់ៗមួយចំនួនដែលជួយឲ្យអ្នកអាចធ្វើអាជីវកម្មទៅជា Franchise បាន ដែលមានដូចខាងក្រោម៖
គម្រោងយុទ្ធសាស្ត្រអាជីវកម្ម
ពិតណាស់រាល់ការធ្វើអាជីវកម្មទាំងអស់សុទ្ធសឹងតែត្រូវមានផែនការណ៍អាជីវកម្មច្បាស់លាស់ ដើម្បីជាត្រីវិស័យនាំផ្លូវទៅរកជោគជ័យ។ យ៉ាងណាមិញ ការធ្វើផែនការណ៍អាជីវកម្មឲ្យទៅជា Franchise វាហាក់មានចំណុចសំខាន់ច្រើនដែលអ្នកត្រូវត្រៀមទុក ដូចជារយៈពេលដែលអ្នកត្រូវលក់សិទ្ធិអាជីវកម្មឲ្យដៃគូជាដើម។ ជាទូទៅ ម្ចាស់អាជីវកម្មតែងតែចង់បញ្ចេញលក់ Franchise របស់ខ្លួនឲ្យបានឆាប់ ប៉ុន្ដែ ដើម្បីអាចលក់សិទ្ធិអាជីវកម្មប្រកបដោយជោគជ័យ ទាមទាឲ្យអាជីវកម្មអ្នកមានកេរិ៍្តឈ្មោះចាស់ទុំសិន (Mature Brand) ជាមួយនឹងស្ថានភាពហិរញ្ញវត្ថុរឹងមាំ។ ស្ថិតក្នុងស្ថានការណ៍នេះ ម្ចាស់អាជីវកម្ម ត្រូវយល់ច្បាស់ពីទីផ្សារ និងអតិថិជនរបស់ខ្លួន ជាមួយនឹងគំរូអាជីវកម្ម ដែលអាចទាញយកអតិថិជនបាន។ ម្យ៉ាងទៀត ម្ចាស់អាជីវកម្មក៏ត្រូវតែត្រៀមនូវផែនការណ៍ទប់ស្កាត់បញ្ហាជាមុននៅពេលលក់សិទ្ធិអាជីវកម្មទៅឲ្យអ្នកដៃគូ ដូចជា លទ្ធភាពក្នុងការផ្គត់ផ្គង់ និងភាពខ្វះចន្លោះនូវជំនាញសំខាន់ៗរបស់ខ្លួនជាដើម។
គំរូប្រតិបត្តិការ
ជាទូទៅ លក្ខណៈពិសេសរបស់អាជីវកម្មបែប Franchise គឺស្ថិតនៅលើការប្រតិបត្តិការដូចៗគ្នា។ ម្ចាស់ដើមអាជីវកម្ម (Franchisor) ត្រូវបង្កើតនូវប្រព័ន្ធគ្រប់គ្រងមួយ ដែលតម្រូវឲ្យបុគ្គលិកទាំងអស់ ត្រូវអនុវត្តទៅតាមអ្វីដែលខ្លួនបានកំណត់ ដូចជាការកំណត់ឲ្យមានរចនាបថនៃហាងនីមួយៗមានលក្ខណៈដូចៗគ្នា ផលិតផល និងសេវាកម្មដូចគ្នាជាដើម។ មិនតែប៉ុណ្ណោះ ម្ចាស់ដើមនៃអាជីវកម្ម ត្រូវផ្ដល់នូវការបណ្តុះបណ្ដាលជំនាញសម្រាប់បុគ្គលិកសាខាថ្មី ព្រមទាំងបង្កើតឲ្យមាននូវគម្ពីរអាជីវកម្ម (Operation Manual) ដែលមានសរុបលម្អិតពីការប្រតិបត្តិការផ្សេងៗសព្វបែបយ៉ាងដែលមាននៅក្នុងដំណើរអាជីវកម្មរបស់ខ្លួន សម្រាប់ឲ្យបុគ្គលិកគ្រប់សាខាយកទៅអនុវត្តតាម។ ការបង្កើតឲ្យមានគំរូប្រិតបត្តិការជាក់លាក់នេះ វាធ្វើឲ្យម្ចាស់ដើមអាជីវកម្មងាយស្រួលក្នុងការគ្រប់គ្រង អាចពង្រីកខ្លួនកាន់តែច្រើន និងបានលឿន។
ឯកសារផ្លូវច្បាប់
ដើម្បីធានាឲ្យបាននូវតម្លាភាពនៃការគ្រប់គ្រង និងការលក់សិទ្ធិអាជីវកម្មបន្ត ម្ចាស់ដើមអាជីវកម្ម ត្រូវតែបង្កើតឲ្យមានគោលការណ៍ និងច្បាប់បញ្ញតិ្តផ្សេងៗដើម្បីគ្រប់គ្រងលើអ្នកទិញសិទ្ធិបន្ត (Franchisee) ដូចជា កិច្ចព្រមព្រៀងលើលទ្ធភាពហិរញ្ញវត្ថុរបស់អ្នកដែលទិញសិទ្ធិអាជីវកម្មបន្ត កំណត់រយៈពេល តម្លៃ នៃការទិញសិទ្ធិ និងផលកម្រៃផ្សេងរវាងម្ចាស់ដើមអាជីវកម្ម និងអ្នកទិញសិទ្ធិអាជីវកម្មជាដើម។ ម្យ៉ាងទៀត ម្ចាស់ដើមនៃអាជីវកម្ម ក៏ត្រូវបង្កើតឲ្យមានជាបទបញ្ញាត្តិផ្សេងៗបន្ថែមទៀត សម្រាប់គ្រប់គ្រងលើអ្នកទិញសិទ្ធិអាជីវកម្ម ដូចជាអ្នកដែលទិញសិទ្ធិនោះអាចមានសិទ្ធិលក់បន្តនៅក្នុងតំបន់ របស់ខ្លួនដែរ ឬទេ? ឧទាហរណ៍៖ ហាងតែគុជ Chatime នៅកម្ពុជាដែលបានទិញ សិទ្ធិអាជីវកម្មពី ប្រទេសតៃវ៉ាន់ និងអាចលក់ Franchise បន្តនៅកម្ពុជាបាន ដោយសារតែពួកគេបានទិញសិទ្ធិផ្តាច់មុខ (Master Franchise) នៅកម្ពុជា ប៉ុន្ដែ បើសម្រាប់អ្នកដែលមិនបានទិញសិទ្ធិផ្តាច់មុខទេ ពួកគេអាចបើកហាងបានតែមួយប៉ុណ្ណោះ ដោយមិនអាចលក់បន្តឡើយ (Unit Franchise)។ បន្ថែមពីនេះ ដើម្បីឲ្យកាន់តែទទួលបាននូវទំនុកចិត្ត និងសុក្រិតភាពក្នុងការបង្កើតនូវគោលការណ៍ច្បាប់សម្រាប់ការធ្វើ Franchise អាជីវកម្មរបស់អ្នក អ្នកគួរតែទាក់ទងទៅកាន់អ្នកឯកទេសផ្លូវច្បាប់ ឬមេធាវី ដើម្បីឲ្យពួកគេជួយសម្រួលដល់កិច្ចការងារនេះ។
កសាងម៉ាកសញ្ញា
ម៉ាកសញ្ញា (Brand) គឺជាចំណុចស្នូលនៃអាជីវកម្ម ដើម្បីទទួលបានជោគជ័យ និងអាចចេញលក់ Franchise បាន។ មានម្ចាស់អាជីវកម្មមួយចំនួនបានចាប់ផ្ដើមអាជីវកម្មរបស់ខ្លួនដំបូងដោយមិនបានយកចិត្តទុកដាក់ពីការកសាងម៉ាកសញ្ញារបស់ខ្លួននោះទេ ពោលគឺពួកគេគ្រាន់តែបង្កើតអាជីវកម្ម តែពួកគេមិនបានបង្កើតម៉ាកផ្ទាល់ខ្លួននោះឡើយ ហេតុនេះ វាងាយនឹងធ្វើឲ្យអាជីវកម្មរបស់ពួកគេឆាប់ជួបនឹងបញ្ហា នៅពេលដែលផលិតផល ឬសេវាកម្មថ្មីដទៃទៀតចូលមក ព្រោះតែអាជីវកម្មពួកគេខ្វះសក្ដានុពលនៃម៉ាកសញ្ញា។ ម្យ៉ាងទៀត នៅពេលដែលអ្នកអាចកសាងម៉ាកសញ្ញារបស់ខ្លួនបានល្បី និងមានការទទួលស្គាល់ពីមនុស្សជាច្រើន នោះតម្លៃ Franchise របស់អាជីវកម្មអ្នកក៏កាន់តែខ្ពស់ផងដែរ។ ដើម្បីឲ្យយល់កាន់តែច្បាស់ពីគុណតម្លៃនៃម៉ាកសញ្ញាយើងចូរអានឧទាហរណ៍ខាងក្រោមនេះ៖
អ្នកប្រហែលជា មានការងឿងឆ្ងល់ណាស់ថា ហេតុអ្វីបានជាហាងភីហ្សានៅកម្ពុជាមានច្រើន តែមានតែហាងមួយចំនួនតូចប៉ុណ្ណោះ ដែលមានអតិថិជននិយមទទួលទាន ជាក់ស្ដែង The Pizza Company ដែលជាម៉ាក Franchise ពីប្រទេសថៃ ចម្លើយដ៏សាមញ្ញនោះគឺដោយសារតែម៉ាកសញ្ញា។ ពេលណាមនុស្សនឹកចង់ទទួលទានភីហ្សា គេនឹងនឹកឃើញដល់ហាងមួយនេះ។ មួយវិញទៀត ហេតុអ្វីបានជាហាងភីហ្សាម៉ាក Domino បង្ហាញវត្តមាននៅកម្ពុជា? ស្របពេលដែលហាងភីហ្សានៅកម្ពុជាក៏មានច្រើនគួរសមដែរហើយ នោះគឺដោយសារតែសក្តានុពលនៃម៉ាកសញ្ញារបស់ហាងភីហ្សាមួយនេះស្ថិតក្នុងលំដាប់អន្តរជាតិដែលបាននាំមកពីអាមេរិក ហើយវាជាម៉ាក Franchise មួយដែលភាពចាស់ទុំគ្រប់គ្រាន់ ដើម្បីទាញយកចំណាប់អារម្មណ៍ពីប្រជាជនក្នុងតំបន់ នេះបើតាមប្រសាសន៍លើកឡើងរបស់លោក គួច សុខលី អគ្គនាយកក្រុមហ៊ុន CBM។ ពិសេសជាងនេះ ប្រជាជនកម្ពុជានាពេលបច្ចុប្បន្នកំពុងមាននិន្នាការទៅលើអាជីវកម្មដែលមានម៉ាកល្បីៗ ដូច្នេះ វាជាឱកាសមួយសម្រាប់អាជីវកម្មក្នុងស្រុកទាំងឡាយគួរតែផ្តោតលើការកសាងម៉ាកសញ្ញាឲ្យខ្លាំង ជាជាងការមើលឃើញប្រាក់ចំណេញក្នុងរយៈពេលខ្លី។
ម៉ាឃីតធីង
ការធ្វើម៉ាឃីតធីងនៅក្នុងប្រព័ន្ធអាជីវកម្ម Franchise ត្រូវបានបង្កើតឡើងច្បាស់លាស់ ជាមួយដំណាក់កាលតាមលំដាប់ដែលមាននៅក្នុងផែនការណ៍ទីផ្សារដែលបានត្រៀមទុក ហើយវាអាចទាក់ទាញអតិថិជនបានគ្រប់ប្រភេទ មិនថាតែអតិថិជនក្នុងតំបន់ ឬក្រៅតំបន់នៅទេ។ លើសពីនេះ ការកំណត់នូវផែនការណ៍ទីផ្សារច្បាស់លាស់របស់ម្ចាស់ដើមអាជីវកម្ម វាជាការផ្ដល់នូវទំនុកចិត្តខ្ពស់សម្រាប់អ្នកដែលទិញសិទ្ធិអាជីវកម្មបន្ត ដើម្បីយកទៅអនុវត្តតាមប្រកបដោយជោគជ័យ។ ជាទូទៅ ម្ចាស់ដើមអាជីវកម្ម Franchise តែងតែផ្ដល់ជូននូវ យុទ្ធសាស្ត្រទីផ្សារចាប់តាំងពីអាជីវកម្មមុនដំណើរការមកម្លេះ។ ក្នុងនោះ ផែនការណ៍ទីផ្សារដែលម្ចាស់ដើម អាជីវកម្មត្រូវផ្ដល់ជូនរួមមាន ការធ្វើការផ្សព្វផ្សាយពីម៉ាកសញ្ញា និងផលិតផល ឬសេវាកម្មដែលត្រៀមនឹងជិតមកដល់ (Prelaunch) និងត្រៀមធ្វើម៉ាឃីតធីង ដើម្បីរៀបចំលើកម្មវិធីបើកសម្ពោធជាដើម (Grand Opening)។ ក្រោយពីអាជីវកម្មបើកសម្ពោធរួចរាល់ ម្ចាស់ដើមអាជីវកម្ម ត្រូវបង្កើតឲ្យមានជាយុទ្ធសាស្ត្រទីផ្សារក្នុងតំបន់ (Local Marketing) ដើម្បីត្រៀមប្រកួតប្រជែង និងទាក់ទាញអតិថិជន។ លើសពីនេះ ម្ចាស់ ដើមអាជីវកម្ម ត្រូវមានក្រុមការងារដើម្បីជួយសម្រួលដល់បញ្ហា ទីផ្សារនានា របស់អ្នកទិញសិទ្ធិ អាជីវកម្ម ផងដែរ។
បច្ចេកវិជ្ជាដែលទាក់ទង
ម្ចាស់អាជីវកម្មដើម ត្រូវស្វែងរកនូវបច្ចេកវិជ្ជាចុងក្រោយទាំងឡាយណា ដែលស័ក្ដិសមជាមួយអាជីវកម្មរបស់ខ្លួន តួយ៉ាងបច្ចេកវិជ្ជាដែលអាចសម្រួលដល់ការលក់ជាដើម។ ឧទាហរណ៍ ឧបករណ៍បញ្ជាកម្ម៉ង់ផលិតផល ឬសេវាកម្មដោយស្វ័យប្រវត្តិ ឬកម្មវិធីទាន់សម័យដែលអាចជួយសម្រួលដល់ប្រព័ន្ធគណនីយជាដើម។ ពិសេសជាងនេះ ក៏គួរតែផ្ដល់សិទ្ធិនូវការប្រើប្រាស់ប្រព័ន្ធផ្សព្វផ្សាយផ្ទាល់ខ្លួនតាមរយៈបណ្ដាញសង្គម និង គេហទំព័រទៅតាមតំបន់ ឬហាងនីមួយផងដែរ។
លក្ខខណ្ឌរបស់អ្នកទិញសិទ្ធិអាជីវកម្ម
ការទទួលយកដៃគូទិញសិទ្ធិអាជីវកម្មបន្ត វាជារឿងមួយដែលម្ចាស់អាជីវកម្មដើមត្រូវពិចារណាឲ្យបានល្អិតល្អន់មុនសម្រេចចិត្តលក់សិទ្ធិអាជីវកម្ម ព្រោះដៃគូទិញសិទ្ធិអាជីវកម្មត្រូវតែជាបុគ្គលដែលមានសមត្ថភាពក្នុងការគ្រប់គ្រង និងមានប្រព័ន្ធហិរញ្ញវត្ថុរឹង ពោលគឺអ្នកត្រូវប្រាកដថា អ្នកដែលនឹងត្រូវទទួលបានសិទ្ធិអាជីវកម្មពីអ្នកនឹងធ្វើឲ្យអាជីវកម្មរបស់អ្នកកាន់តែរីកចម្រើន និងទទួលបានជោគជ័យ ដោយកុំសម្លឹងឃើញតែប្រាក់ដែលគេមានឲ្យសោះ។ ជាទូទៅ អ្នកគួរតែជ្រើសរើសនូវបុគ្គលទាំងឡាយណាដែលមានបទពិសោធន៍ល្អក្នុងការលក់ ធ្លាប់ ឬកំពុងមានអាជីវកម្មផ្ទាល់ខ្លួន និងមានភាពជឿជាក់ខ្ពស់ដើម្បីសម្រេចជោគជ័យជាដើម។
ចំណុចខាងលើទាំងអស់នេះ គ្រាន់តែជាខ្លឹមសារគោលសំខាន់ៗមួយចំនួនដែលពាណិជ្ជកម្ម កម្ពុជាដកស្រង់មកដើម្បីចែករំលែកដល់សហគ្រិន និងមិត្តអ្នកអានប៉ុណ្ណោះ។ ដើម្បីជ្រាបកាន់តែលម្អិត និងស្វែងយល់ខ្លឹមសារផ្សេងៗបន្ថែមទៀត អ្នកអាចស្វែងរកសៀវភៅដែលសរសេរពីការគ្រប់គ្រង ឬបង្កើតអាជីវកម្មនេះ ស្វែងរកតាមអ៊ីនធើណែត ឬបន្តតាមដានជាមួយទស្សនាវដ្ដីពាណិជ្ជកម្ម កម្ពុជានៅលេខក្រោយៗទៀត។