ដំបូន្មានទាំង៥មុនសម្រេចចិត្តទិញខុនដូរ

មនុស្សជាច្រើនតែងតែមានក្ដីស្រមៃ​ចង់បានលំនៅដ្ឋាន​មួយអាចរស់នៅ​ជាមួយមនុស្សជាទីស្រឡាញ់​របស់ខ្លួន​ប្រកប​ដោយសុភមង្គល និងភាពថ្លៃថ្នូរ។ ស្របពេលដែលកំណើនសំណង់អគារលំនៅដ្ឋានជាច្រើន ត្រូវបានសាងសង់ឡើង​គួរឲ្យ​គត់​សម្គាល់ តួយ៉ាង ក្នុងឆ្នាំ២០១២ ការផ្គត់ផ្គង់លំនៅដ្ឋាននៅកម្ពុជាមានប្រហែល ២០.០០០ខ្នង ខណៈតម្រូវ​ការមាន​ក្នុងកម្រិតពី ១០.០០០ ទៅ១៥.០០០ខ្នងរៀងរាល់ឆ្នាំ។ ហេតុនេះ ដើម្បីទទួលបានលំនៅដ្ឋាន​ដូចដែលមាន​នៅក្នុងក្ដី​ស្រមៃនោះ ខុនដូរគឺពិតជាលំនៅដ្ឋានដ៏ស័ក្ដិសមបំផុតសម្រាប់ក្រុមគ្រួសារសម័យថ្មី ស្របទៅនឹងបរិបទសង្គម​ដែល​កំពុង​មានការអភិវឌ្ឍន៍ជាលំដាប់។ ប៉ុន្ដែ ដើម្បីទិញ និងរស់នៅក្នុងគេហៈដ្ឋានប្រភេទនេះ វាមានការខុស​ប្លែកគ្នា​ខ្លះ​ពី​ផ្ទះ​ល្វែង ឬវីឡាជាដើម។ ខាងក្រោមនេះ គឺជាចំណុចខ្លឹមសារសំខាន់សម្រាប់លោកអ្នកស្វែងយល់ មុននឹង​សម្រេច​​ចិត្តទិញខុនដូររស់នៅ ៖

ទិញដោយបង់រម្លស់

លទ្ធភាព គឺជាបញ្ហាដ៏ចម្បងមុននឹងសម្រេចចិត្តទិញផ្ទះ ឬខុនដូរ ជាក់ស្ដែងនៅក្នុងសម័យបច្ចុប្បន្នកាន់តែមានភាព​ជឿនលឿនទៅមុខ ជំរុញឲ្យរាល់ការទិញសម្ភារប្រើប្រាស់ និងផ្ទះសម្បែង លោកអ្នកអាចមានលទ្ធភាពទិញបង់​រម្លស់​ជាមួយធនាគារ និងក្រុមហ៊ុនបង់រម្លស់នានាដែលមានការប្រាក់សមរម្យ និងប្រកបដោយភាពងាយ​ស្រួល​ជាង​មុន។ តួយ៉ាង តម្លៃខុនដូរនៅ Decastle Royal ដែលមានតម្លៃចាប់ពី ១៤ម៉ឺន ដល់៤០ម៉ឺនដុល្លារអាមេរិក​ទៅតាមប្រភេទ​បន្ទប់នីមួយៗ ក្នុងនោះលោកអ្នកអាចធ្វើការបង់រម្លស់ជាមួយធនាគារកាណាឌីយ៉ា ដែលអាចបង់ចាប់ពី៤០ ទៅ៧០​ភាគរយ ឬអាចបង់ផ្ទាល់ជាមួយក្រុហ៊ុនផ្ទាល់ក៏បានដែលវាមានទៅតាមលក្ខខណ្ឌ ឬអត្រាបង់ជាសាច់​ប្រាក់ទៅតាម​ក្រុមហ៊ុននីមួយៗបានកំណត់។

ច្បាប់ និងបទវិន័យផ្សេងៗក្នុងការរស់នៅ

តាមសម្ដីរបស់លោកអ៊ិន ស៊ីថា នាយកគ្រប់គ្រងទូទៅ នៃក្រុមហ៊ុន VTRUST REALITY បានឲ្យដឹងថា បែបបទ​ឯកសារ​ដើម្បីរៀបចំក្នុងការទិញខុនដូរ វាមានលក្ខណៈងាយស្រួលជាងការទិញអាផាតមិន និងផ្ទះល្វែង ព្រោះភាគ​ច្រើនក្រុមហ៊ុនដែលលក់ខុនដូរ ជាអ្នករាប់រងនូវការរត់ការផ្សេងៗជាមួយរដ្ឋាភិបាល។ ខុសពីផ្ទះការទិញអាផាតមិន និងផ្ទះ​​ល្វែង ដែលអ្នកទិញត្រូវធ្វើការរត់ការខ្លួនឯង ឬត្រូវជួលក្រុមហ៊ុនភ្នាក់​ងារអចលនទ្រព្យដើម្បីជួយ​សម្រួលកិច្ចការ​នេះ។ មិនតែប៉ុណ្ណោះ មុននឹងសម្រេចចិត្តទិញលោកអ្នកចាំបាច់ត្រូវដឹងពីក្រមវិន័យក្នុងការរស់នៅទីនោះផងដែរ ដូចជា៖ ប្រសិនបើចង់ចិញ្ចឹមសត្វចញ្ចឹមដូចជាឆ្កែ ឆ្មានៅក្នុងផ្ទះតើមានការអនុញ្ញាតិពីអ្នកគ្រប់គ្រងនៅទីនោះដែរ​ ឬទេ? តើអ្នកអាចជួលបន្តឲ្យទៅអ្នកដ៏ទៃបានដែរ ឬទេ? ហើយតើនៅទីនោះមានភាពស្ងប់ស្ងាត់សម្រាប់រស់នៅឬទេ? តើមានអាងហែលទឹក កន្លែងហាត់ប្រាណ ឬកន្លែងកម្សាន្ដផ្សេងទៀតដែរឬទេ?

ការចំណាយទូទៅ

ការចំណាយផ្សេងៗសម្រាប់ការរស់នៅក្នុងខុដូរ វាក៏មិនខុសពីការរស់នៅក្នុងផ្ទះល្វែង បុរី ឬអាផាតមិនដែរ ដោយអ្នក​ដែលជាម្ចាស់កម្មសិទ្ធត្រូវធ្វើការបង់ទៅលើសេវាសាធារណៈផ្សេងៗដូចជា ទឹក ភ្លើងដោយខ្លួនឯង។ បន្ថែមពីនេះ ម្ចាស់​ខុនដូរ ត្រូវបង់ទៅលើសេវាកម្មគ្រប់គ្រងទូទៅរបស់ក្រុមហ៊ុនផងដែរ ដូចជា ផ្នែកសន្ដិសុខ ការសម្អាត និងសេវាកម្ម​ផ្សេង​ទៀត តួយ៉ាងនៅក្នុង ខុនដូរ របស់ក្រុមហ៊ុន Decastle Royal ចំពោះការចំណាយទាំងអស់នេះ ត្រូវបាន​កំណត់​តម្លៃ០.៥០សេន ក្នុងផ្ទៃមួយម៉ែត្រការ៉េនៃខុនដូរទំហំសរុបនោះ។ មួយវិញទៀត ក៏មានខុនដូរមួយ​ចំនួនបានបង្កើតនូវ​សេវាកម្មបន្ថែមមួយទៀត គឺផ្នែកសេវាកម្មជួសជុលលំនៅដ្ឋាន និងសង្គ្រោះបន្ទាន់ដែលអាចឲ្យអ្នកដែលរស់​នៅក្នុង​ខុនដូរ​អាចមានទំនុកចិត្តក្នុងការរស់នៅគ្រប់ពេលវេលា។

ការប្រឹក្សាយោបល់

មុននឹងសម្រេចចិត្តទិញខុនដូរដែលប្រកបទៅដោយគុណភាព និងទំនុកចិត្តក្នុងការរស់នៅ លោកអ្នកចាំបាច់ត្រូវ​មាន​ការពិគ្រោះយោបល់ពីអ្នកគ្រប់គ្រងនៅទីនោះ។ ជាទូទៅ ក្រុមហ៊ុនដែលដាក់លក់ខុនដូរ ពួកគេតែងតែផ្ដល់នូវការ​ប្រឹក្សា​សម្រាប់អតិថិជនពីគុណភាពរបស់អាគារ និងមានផ្ដល់ជូននូវសេវាកម្មផ្សេងៗទៀត។ តាមរយៈការផ្ដល់ការប្រឹក្សានេះ លោកអ្នកនឹងបានជ្រាបកាន់តែច្បាស់ពីប្រភេទសំណង់នៃអាគារដែលបានរចនាទៅតាមបែបផែននីមួយៗ​ស្របជាមួយ​យុគ្គសម័យដ៏ទំនើប ដែលធ្វើឲ្យជីវិតរស់នៅក្នុងក្រុមគ្រួសារប្រកបដោយភាពថ្លៃថ្នូរ និងសុភមង្គល។ លើសពីនេះ ក្រុមហ៊ុនលក់ខុនដូរ​មួយ​ចំនួន​ក៏មានការជួបប្រជុំរៀងរាល់១ឆ្នាំ ឬ២ឆ្នាំម្ដងរវាងអ្នកគ្រប់គ្រងក្រុមហ៊ុន និងម្ចាស់ខុនដូរ ទាំងអស់ ដែលការជួបជុំនេះ ត្រូវធ្វើឡើងដើម្បីឲ្យម្ចាស់ខុនដូរទាំងនោះបានបញ្ចេញមតិយោបល់ពីផលវិជ្ជមាន និងផល អវិជ្ជមានបន្ទាប់ពីពួកគេបានរស់នៅក្នុងលំនៅដ្ឋាននោះកន្លងមក។ ស្របគ្នានេះ ប្រសិនជាអាចលោកអ្នកគួរតែ ចូលរួម ជាមួយពួកគេដើម្បីទទួលបានគំនិតយោបល់ពីអ្នកដែលបានរស់នៅទីនោះ ឬអាចសាកសួរទៅកាន់ អ្នកដែលធ្លាប់រស់​នៅ​ខុនដូរ​​ពីមុនៗក៏បាន។ ព្រោះពួកគេទទួលបានបទពិសោធន៍យ៉ាងច្រើនក្នុងការរស់នៅលំនៅដ្ឋានដ៏ស៊ីវិល័យនេះ។

តំហែទាំ និងទំនុកបម្រុង

លំនៅដ្ឋានដែលមានផាសុកភាពសម្រាប់រស់នៅចាំបាច់ត្រូវមានការមើលថែទាំ និងសម្អាតជាប្រចាំ ហេតុនេះ ដើម្បី​ទទួល​បានលំនៅដ្ឋានខុនដូរដែលមានសោភ័ណភាពស្រស់ស្អាត និងផាសុក​ភាពលោកអ្នក​ត្រូវពិនិត្យឲ្យបាន​គ្រប់​ជ្រុងជ្រោយនៅក្នុងបន្ទប់ ករណីលំនៅដ្ឋាននោះធ្លាប់មានមនុស្សរស់នៅពីមុន។ ព្រោះថា ប្រសិនបើម្ចាស់​ខុនដូរពីមុន​នោះមិនសូវបានសម្អាតពីមុនមកនោះ វានឹងធ្វើឲ្យលោកមិនចង់ចូលទៅរស់នៅឡើយ ម្យ៉ាងទៀត ការសម្អាត និងមើល​ថែទាំនេះ វាមិនត្រឹមតែផ្ដល់នូវភាពសុកស្រួលដល់ការរស់នៅប៉ុណ្ណោះទេ ប៉ុន្ដែវាក៏ជួយរក្សានូវតម្លៃនៃខុនដូរនៅពេល​ដែលលោកអ្នកចង់លក់បន្តទៅឲ្យអ្នកដទៃផងដែរ។ មួយវិញទៀត អ្នកក៏គួរតែដឹងពីទំនួលខុសត្រូវចំពោះបញ្ហា​ដែល​កើត​មានឡើងនៅក្នុងលំនៅដ្ឋានខុនដូររបស់ខ្លួនផងដែរ។ ឧទារហណ៍ បើមានការបែកទុយោទឹក ឬដាច់ខ្សែភ្លើង​នៅក្នុងបន្ទប់ តើជាទំនួលខុសត្រូវរបស់លោកអ្នកដែលជាម្ចាស់ខុនដូរ ឬជាទំនួលខុសត្រូវ​របស់ក្រុមហ៊ុនដែល​លក់​ខុនដូរនោះ? ប៉ុន្ដែ សម្រាប់ក្រុមហ៊ុនលក់ខុនដូរភាគច្រើនគឺទម្លាក់ទំនួលខុសត្រូវនេះ​ចំពោះបុគ្គលដែលជាម្ចាស់របស់​ខុនដូរផ្ទាល់តែម្ដង។